Porta ventosa: Avogacía. Sen lingua ou dereito propio?

microtoponimia

prado de Eiroas Gumil cova de Agrelo

Beirán o Mexerico agra de Toba

pelouros nomes marcos de palabras

rabuñados na terra co legón

¿quen vos invocará agora?

indescifrables nomes do pequeno

seca a lingua que vos levou debaixo

como pedras no río do olvido

¿quen dirá Rego Foxo Seis Ferrados?

medidos paso a paso co calibre

de calcular as airadas do vento

o círculo perfecto dos abruños

a Chousura

Xarois as Viñas

nunca escritos prendidos só na estrema

que divide agra e agra

pasadíos como a risca laranxa

dun vimbio

agra de Guimareu Porta Ventosa

Rego Mar Carballases Sete Grixas

¿por canto tempo aínda

ficaredes prendidas na memoria?

¿quen lembrará que se vían sete igrexas?

Trala Horta Estivadas

Os Milladoiros Dornas

O Noucho Fontefría Tallo do Vao

¿quedarán carballos nos Carballases?

¿soprará o nordés pola Porta Ventosa?

Marilar Aleixandre, Desmentindo a primavera